Ўзбекистон технологик металлар комбинати (ТМК) халқаро ҳамкорликни фаоллаштирмоқда

Ўзбекистонда илк бор софлиги 99,9 фоиз бўлган рений металли экспорт қилинди.

Рений металли экспорти Ўзбекистон технологик металлар комбинати (ТМК) ва Эстониянинг “VLCor Baltic OU” компанияси ўртасида имзоланган шартнома асосида амалга оширилди. Бу Ўзбекистонда рений металли экспортининг амалдаги бошланишидир.

Рений – мураккаб технологиялар, аэрокосмик соҳалар ва юқори ҳароратли суперқотишмалар ишлаб чиқаришда жаҳонда тан олинган стратегик металл ҳисобланади.

ТМК томонидан 2025 йилнинг биринчи ярим йиллигида  амалга оширилган экспорт ҳажми  21,3 миллион АҚШ доллари (ўсиш 118 фоиз)ни ташкил этди.

***

Ўзбекистон технологик металлар комбинати АЖ (ТМК) ва Хитойнинг “PPP (Hong Kong) Ltd.” компанияси вакиллари ўртасида учрашув бўлиб ўтди.

Учрашув аввалида ТМК вакиллари комбинатнинг ҳозирги фаолияти ва истиқболли инвестиция лойиҳаларига бағишланган тақдимот ўтказишди.

Икки томонлама ҳамкорликни ривожлантириш учун кенг имкониятлар мавжудлиги қайд этилди. Хусусан, Ўзбекистонда яратилаётган қулай инвестиция муҳитидан фойдаланган ҳолда, критик хомашё йўналишида қўшма корхона ташкил этиш таклифи илгари сурилди.

“PPP (Hong Kong) Ltd.” вакиллари компаниянинг хром, никель ва кобальтни қайта ишлаш ҳамда ушбу металлар асосида маҳсулот ишлаб чиқариш бўйича салоҳияти ва замонавий технологияларга эгалигини билдирди. Компания, шунингдек, Ўзбекистонда хром хомашёсини қайта ишлаб соф хром ишлаб чиқаришни йўлга қўйиш бўйича ҳамкорликка тайёрлигини маълум қилди.

“PPP (Hong Kong) Ltd.” компанияси Гонконгда рўйхатдан ўтган. У хром, никель, кобальт каби стратегик металлар билан ишловчи халқаро компания бўлиб, Хитой, БАА, Жанубий Африка, Ҳиндистон, Миср ва Қозоғистон каби йирик бозорларни қамраб олган.

***

Ўзбекистон технологик металлар комбинати АЖ (ТМК) ва Хитойнинг етакчи муҳандислик-инжиниринг компанияси – “China Aluminum International Engineering Co., Ltd.” (Chalieco) ўртасида муҳим аҳамиятга эга янги ҳужжатлар имзоланди.

Жумладан, томонлар ўртасида вольфрам гидрометаллургия цехини модернизация қилиш бўйича шартнома, шунингдек, илғор инновацион технологияларни жорий этиш юзасидан Ҳамкорлик меморандуми тузилди.

“China Aluminum International Engineering Co., Ltd” (Chalieco) – бу Хитойнинг йирик давлат корпорацияси “Aluminum Corporation of China” (Chinalco) таркибига кирувчи компания ҳисобланади.

2003 йилда ташкил этилган мазкур компания бугунги кунда EPC хизматларидан тортиб, инновацион технологияларни жорий этиш, ускуналар ишлаб чиқаришгача бўлган кенг кўламли йўналишларни қамраб олган.

“Дунё” АА